Mga Tanong ni Maria

This is the 11th poem for 13b42013 Poetry Series.

Mga Tanong ni Maria

Jillian Vergara

Nakadungaw sa bintana, sa mga bituin nakatingala

Si Maria na tahimik, puno ng pagkabahala

Sa dami ng katanungang nabuo sa kanyang diwa

Hindi na alam kung ano at alin ang dapat mauna

Unang tanong, “Paano nagsimula?”

Paanong ang isang taong hindi niya kilala,

Ay naging bahagi ng magulong mundo niya.

Lalo’t higit pa, ang nagpahilom ng puso niyang ulila.

Ikalawang tanong, “Kailan nag-iba?”

Ang ikot ng mundo, ang ningning ng mga tala?

Mga bagay na sa paningin noon ay walang halaga,

Nabigyan ng kahulugan at magandang ala-ala.

Ikatlong tanong, “Sino siya?”

Isang taong masasabi niyang tunay na dalubhasa

Sa paraang nagpakislap sa kanyang mga mata

At hindi inaasahang nagpatibok sa puso niya

Ikaapat na tanong, “Saan mapupunta?”

Ang sa una’y maganda, mahuhuli rin sa wala

Nang kanyang matuklasan, malaking sampal sa mukha

Sa puso ng mahal niya, hindi pala siya nag-iisa

Ikalimang tanong, “Bakit naniwala?”

Sa magandang pakikitungo, sa matamis na salita

Walang ibang dapat sisihin kundi ang sarili niya

Pagdurusa ng puso, hiling niya ay matapos na.

Naging mahirap para kaniya

Ang manahimik na lang at mag-aktong masaya

Sa tulong ng mga katanungang tumimo sa utak niya,

Sagot niya’y “Tapos na ating kabanata, paalam aking sinta.”

Lumipas ang panahon, may nagbago ba?

Marahil sa unang tingin, teka, parang wala

Ngunit sa loob niya, batid ng dalaga

Na ang puso niya’y payapa at masaya,

Balik sa simula.

Jillian Vergara is a BS Major in Accountancy junior in Araullo University-PHINMA and is a Staff Writer of Viewpoint.  This poem is based on a young woman's love story that ended sadly and too soon, and is inspired by the love stories of her barkada, Barney and Friends. She dedicates this poem to her friends Barney, Emily, Erika, Joana and R.A. This poem is composed as a part of 13b42013  Poetry Series.